Gjykata e Tiranës ka dënuar me nga 3 vjet e 6 muaj burg tre persona të akuzuar për “dëmtim me dashje të materialeve zgjedhore”.
Bëhet fjalë për Altin Picarin dhe Leonard e Ylli Hajdarin, përkatësisht 38, 29 dhe 24 vjeç u fajësuan për tentimin e djegies së një dhome të fshehtë votimi në një KZAZ në Vorë, pak ditë para votimeve të 30 qershorit të vitit të shkuar.
Ndonëse u dënuan me burg, tre të pandehurit nuk do të shkojnë në qeli, pasi gjykata vendosi t’i lerë në Shërbim Prove për një periudhë 3-vjeçare.
Sipas vendimit, ngjarja ka ndodhur paraditen e 19 qershorit të kaluar, kur para KZAZ-së që ndodhej në shkollën 9-vjeçare të Marqinetit, po zhvillohej një tubim nga subjektet politike PD e LSI dhe punonjës të Bashkisë Vorë.
Pas disa përplasjeve me policinë dhe sprapsjeve prej saj, tre të pandehurit kanë kaluar gardhin në anën e pasme të godinës dhe janë futur brenda duke thyer dyert.
Ata janë arrestuar në flagrancë, teksa po i vinin flakën kutisë së një dhome të fshehtë votimi, zjarr që është fikur nga punonjësit e policisë.
