Prokurori i Apelit të Durrësit, Ludovik Dodaj do të përballet të enjten më 4 qershor me Komisionin e Pavarur të Kualifikimit. Procesi i vetingut për Z. Dodaj po kryhet nga trupa gjyqësore e përbërë nga Suela Zhegu, Olsi Komici dhe Genta Tafa Bungo.
Ludovik Dodaj punon si prokuror pranë Gjykatës së Apelit të Durrësit prej vitit 2002. Në dhjetor të vitit 2019, ai u zgjodh përmes shortit anëtar i Këshillit të Emërimeve në Drejtësi.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale. Skeda grafike e mëposhtme paraqet ndryshimin e pasurisë së deklaruar të prokurorit Ludovik Dodaj nga viti 2003 deri në fund të vitit 2017. [Kliko për skedën në PDF]
Ky raport është prodhuar nga BIRN pas administrimit të deklaratave të pasurisë së këtij subjekti nga Inspektoriati i Lartë i Deklarimit dhe Kontrolli të Pasurive dhe Konfliktit të Interesit, ILDKPKI. Ai ka për qëllim bërjen e transparencës mbi pasurinë e gjyqtarëve dhe prokurorëve që i nënshtrohen procesit të vetingut.
Në deklaratën e vitit 2003, prokurori Dodaj deklaronte pasuri me vlerë 2.3 milionë lekësh, ndërsa në fund të vitit 2017, pasuria e familjes së tij është rritur me 12 herë, duke kapur vlerën e 29.1 milionë lekëve.
Pasuria e patundshme zë pjesën kryesore të aseteve familjare me vlerë 20.2 milionë lekë, e ndjekur nga kursimet e akumuluara në cash prej 6.1 milionë lekësh. Ai deklaron familjarisht edhe automjete në vlerën e 2.2 milionë lekëve dhe likujditete bankare prej 455 mijë lekësh.
Të ardhurat familjare për periudhën deklaruese janë 38.6 milionë lekë. Rreth 56% e të ardhurave kanë si burim pagën nga funksioni i prokurorit të Z.Dodaj, ndërsa pagat e familjarëve zënë 28% të totalit të të ardhurave. Rreth 2% e të ardhurave janë siguruar nga aktiviteti i biznesit të djalit dhe rreth 12% listohen si të ardhura nga burime të tjera.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga 14 deklaratat që iu nënshtruan kontrollit aritmetik/logjik, njëra prej tyre rezulton me probleme.
Në vitin 2006, subjekti deklaron një kontratë sipërmarrje për blerje apartamenti në vlerën e 45 mijë eurove, nga të cilat ka paguar 25 mijë euro. Si burim për pagesën e këstit, prokurori ka deklaruar një kredi bankare prej 1.2 milionë lekësh dhe mbetet e paqartë se me çfarë është financuar pjesa tjetër. [Nuk deklarohet pakësim i kursimeve cash prej 2.2 milionë lekësh]
Për këtë arsye, viti 2006 rezulton me diferencë të pajustifikuar prej 221 lekësh, pa llogaritur në këtë analizë shpenzimet vjetore të konsumit jetik.
Nga analiza cilësore e deklaratave të pasurisë, BIRN identifikoi si “flamur të kuq” akumulimin e kursimeve në cash si dhe huatë e marra nga subjekti dhe familjarët e tij përgjatë viteve deklaruese.
Nga viti 2003-2017, shuma e akumuluar si kursime në cash kap vlerën e 6.1 milionë lekëve, e cila tejkalon kufirin ligjor të 1.5 milionë lekëve, që zyrtarët publikë mund të mbajnë jashtë sistemit bankar.
Gjithashtu, prokurori Dodaj deklaron marrjen e një huaje prej 8 mijë eurosh nga kunati i tij që banon në Greqi në vitin 2009, e cila rezulton e shlyer. Ndërsa në vitin 2015, edhe vajza e tij deklaron marrjen e një huaje prej 10 mijë eurosh, gjysma e së cilës është shlyer brenda vitit.
Edhe djali i subjektit deklaron marrjen e një huaje prej rreth 26 mijë eurosh në vitin 2017 për të financuar mobilimin e një apartamenti të blerë prej tij dhe bashkëshortes në vlerën e 70 mijë eurove.
Duke qënë se ky raport bazohet në të dhëna statistikore të analizuara nëpërmjet një databaze, ai nuk nxjerr përfundime mbi pasurinë e subjektit nëse ajo është e ligjshme ose jo, por mëton të informojë publikun mbi pasurinë e deklaruar të zyrtarit publik nëpërmjet një formati të thjeshtë dhe të kuptueshëm grafik.
Deklarata e pasurisë për vitit 2003
Deklarata e pasurise për vitit 2004
Deklarata e pasurisë për vitit 2005
Deklarata e pasurise për vitit 2006
Deklarata e pasurisë për vitit 2007
Deklarata e pasurisë për vitit 2008
Deklarata e pasurisë për vitin 2009
Deklarata e pasurisë për vitin 2010
Deklarata e pasurisë për vitin 2011
Deklarata e pasurisë për vitin 2012
Deklarata e pasurisë për vitin 2013
Deklarata e pasurisë për vitin 2014
Deklarata e pasurisë për vitin 2015
Deklarata e pasurisë për vitin 2016
Deklarata e pasurisë për vitin 2017 / /BIRN/
