Altin Hazizaj, Drejtor i Qendrës për Mbrojtjen e të Drejtave të Fëmijëve në Shqipëri bëri një deklaratë të fortë në emision duke thënë se shkollat duhet shikuar si vendi ku pedofilat gjejnë terren.
“Në shkolla pedofilat po gjejnë terren. Dhe shkolla nuk ka reagim. Kur nuk reagon Ministria e Arsimit, drejtori i shkollës si mund të marrë zë komshiu? Është e turpshme heshtja që bën Ministria e Arsimit”, tha në emisionin Open Hazizaj.
Ai tha se qendra që drejton ka 2 muaj që e heton rastin. Hazizaj u ndal edhe tek gjendja aktuale e vajzës.
“Aktualisht vajza është mirë. Është një vajzë me kurajo dhe me guxim. Është marrë në mbrojtje nga sistemi i mbrojtjes së fëmijëve, alo 116 dhe sistemi i mbrojtjes i Kamzës.
Vajza është shumë mirë dhe ka një karakter të fortë. Por dalja e babait dhe vëllait në media ka qenë e pashpjegueshme. Ne ju kemi shpjeguar që të mos të dilnin, por ata kanë dalë vetë”, tha Hazizaj.
Më tej, ai është shprehur se në dy muajt e fundit që Qendra për Mbrojtjen e të Drejtave të Fëmijëve në Shqipëri (CRCA) ka bashkëpunuar me Policinë, ajo ka qenë “fantastike”.
“Përsa i përket aspektit policor, babai thotë se ai ka bërë kallëzim para 6 muajsh. Por une se kam të konfirmuar. Ndërkohë për dy muajt ku ne kemi punuar ata kanë qenë vërtet perfekt. Kemi gjetur të gjithë autorët për dy javë. Në aspektin policor ka qenë fantastike (Policia)”, tha Altin Hazizaj.
Sipas Hazizaj, më shqetësuese është rasti se në video kishte shumë pëlqime dhe komente ndaj rastit dhe nuk e guxoi askush ta denonconte.
“Në një rrjet social që unë sdua t’ia them emrin është publikuar videoja. Në videon e publikuar kishte 1400 like dhe shumë burra dhe djem që bënin komente. Komentet ishin bëj dhe këtë, bëj dhe atë. Aty kishte dhe tekst. Kuptohej që ishte përdhunim dhe s’kishte diçka të bërë më dëshira nga ana e vajzës.
Kjo tregon që ne kemi një shoqëri maskiliste e cila nuk ka edukimin minimal mbi marrëdhëniet seksuale”, tha Hazizaj.
