Policia e Shtetit njofton të gjithë qytetarët se nesër “do të jenë të hapura të gjitha bizneset, si dhe do jetë e lirë lëvizja për këmbësorët, por nuk do lejohet në asnjë qytet të vendit qarkullimi i automjeteve, në kuadër të zbatimit të masave kufizuese për parandalimin e përhapjes së COVID-19″.
“Gjithashtu, edhe për këtë fundjavë nuk do lejohet hyrja dhe dalja në zonat e kuqe, si dhe ndalohet lëvizja drejt plazheve nga zonat që nuk janë zona bregdetare. Policia e Shtetit kërkon mirëkuptimin e qytetarëve që të zbatojnë me rigorozitet ndalim-qarkullimin me automjete për ditën e nesërme, si dhe të respektohet distancimi social në të gjithë vendin”, thuhet në një njoftim të Policisë, që në fakt bie në kundërshrtim me urdhrin e firmosur dje nga Ministrja e Shëndetësisë, Ogerta Manastirliu.
Në pikën 1 të urdhrit të firmosur nga Manastirliu dhe të publikuar dje nga Ministria e Shëndetësisë, saktësohet qartësisht se e vetmja lëvizje e ndaluar është ajo nga zonat e kuqe në ato jeshile e anasjelltas.
Sot, ndërkohë, policia del me një vendim që i kundërvihet urdhrit të Ministres së Shëndetësisë, duke urdhëruar ndalimin e lëvizjeve me automjete.
