Dy raste pozitivë me koronavirus janë zbuluar së fundmi te spitali “Shefqet Ndroqi”, teksa ky i fundit iu rikthye normalitetit, pasi prej javësh funksionoi si spital Covid.
Abc News raporton se një rast është një 80-vjeçare, e cila fillimisht ka qenë e shtruar në pavionin e sëmundjeve të brendshme në QSUT.
Nga Sëmundjet e Brendshme ka shkuar në shtëpi. Ndërkohë pas shtatë ditësh në shtëpi e moshuara ka shfaqur komplikacione në mushkëri dhe është dërguar në Sanatorium, teksa ky i fundit u hap, dhe nuk është më spital Covid.
80-vjeçarja ka ndërruar jetë të enjten. Teksa ishte e shtruar në Sanatorium të moshuarës i është marrë tamponi, dhe ka rezultuar pozitive me Covid-19. E moshuara është konfirmuar e infektuar nga virusi pasi kishte ndërruar jetë.
Ndërkohë, rasti tjetër në Sanatorium është një pacient nga Librazhdi. Pasi i është bërë tamponi dhe ka dalë pozitiv, ai është transportuar te Infektivi.
Kujtojmë se ditën e sotme Instituti i Shëndetit Publik konfirmoi 23 raste të reja me koronavirus gjatë 24 orëve të fundit në vend.
