Presidenti Ilir Meta ka reaguar pas takimit me kërkesën e tij në Pallatin e Brigadave, me kryetarët e partive të opozitës. Sipas burimeve zyrtare, Teatri Kombëtar, ecuria e reformës zgjedhore dhe situata e COVID ishin çështjet e diskutuara në takim.
Në një njoftim të zyrës së shtypit pranë Presidencës thuhet se, Presidenti Meta i falenderoi për angazhimin dhe propozimet e tyre për tejkalimin sa më parë të situatës së vështirë të krijuar nga COVID-19.
“Kreu i Shtetit shprehu shqetësimin e thellë për ngjarjen e fundit të shembjes së paligjshme të Teatrit Kombëtar dhe e cilësoi atë si provokim për demokracinë, shtetin ligjor, por edhe për Opozitën e Bashkuar dhe natyrisht ndaj vlerave europiane. Presidenti Meta i informoi për përpjekjet dhe propozimin prej tij të një platforme konkrete gjithëpërfshirëse për integrimin europian”, thuhet në njoftim.
Presidenti Meta, informon po ashtu zyra e Presidencës, theksoi rëndësinë që Opozita e Bashkuar të japë kontributin e saj në Këshillin Politik (i ngritur për Reformën Zgjedhore) për të treguar vullnetin për rikthimin e legjitimitetit të të gjithë institucioneve përmes zgjedhjeve të lira e të ndershme.
