Presidenti Ilir Meta ka thirrur sot në orën 9:00 një takim në Pallatin e Brigadave me PD-në dhe aleatët e saj.
Bisedimet mendohet të përqendrohen të çështja e Teatrit Kombëtar, e shembur të Dielën me vendim të Bashkisë së Tiranës dhe pëlqimin e kryeministrit Edi Rama.
Kreu i shtetit ka qenë i ashpër me akuzat kundër qeverisë, madje kërkoi edhe hetim ndërkombëtar për shembjen e teatrit, ndërsa sot pritet për t’u parë se cili do të jetë vendimi, teksa opozita ka bojkotuar edhe Reformën Zgjedhore.
Kjo është hera e dytë që Ilir Meta thërret partitë opozitare, pasi hera e parë ishte në nëntor të vitit të kaluar.
Presidenti ka ndjekur prej fillimit çështjen e teatrit të cilin e çoi dy herë në Gjykatë Kushtetuese, por nuk mundi të ndalonte shembjen e tij.
Pasi shembja e teatrit u bë fakt i kryer mëngjesin e se dielës, kreu i shtetit ofroi mbështetjen ndaj Aleancës për Mbrojtjen e Teatrit që këtë çështje ta ndjekin deri në strukturat ndërkombëtare.
“Mbështes fuqimisht një hetim ndërkombëtar për shkatërrimin antikushtetues, të paligjshëm dhe në mënyrën më antievropiane të Teatrit Kombëtar. Gati të bashkëpunoj me Aleancën për Mbrojtjen e Teatrit, si dhe me çdo institucion evropian dhe ndërkombëtar për Kulturën”, u shpreh Meta.
