Një protokoll i hollësishëm masash është hartuar nga liga spanjolle, e cila i është paraqitur klubeve. Në protokoll përshkruhen masat që duhen aplikuar gjatë një ndeshje futbolli për ndeshjet e mbetura të sezonit 2019-2020.
Në ndeshjet e La Ligës, brenda stadiumit do të lejohen vetëm 197 persona. Lojtarët dhe stafi duhet të bëjnë teste ndaj Covid-19 24 orë para ndeshjeve dhe temperaturat e tyre të maten gjatë rrugës për në stadium. Ndryshe nga Bundesliga, në Spanjë nuk do të ndalohen festimet e golave mes lojtarëve. – raporton “The Guardian“.
Një sistem i bazuar në ngjyra do të funksionojë në stadiume. Secili stadium do të jetë i ndarë në tri zona: zonën e gjelbër, atë të kaltër dhe atë të kuqe (jashtë stadiumit). 94 persona do të lejohen në zonën e gjelbër, përfshirë këtu lojtarët, trajnerët dhe stafin mjekësor, si dhe policët, rojet e sigurimit dhe personeli i ditëve të ndeshjeve.
Zona e kaltër do t’i përfshijë 103 njerëz, ku do të jenë të përfshirë zyrtarët e klubeve dhe punëtorët e televizioneve. Lojtarët dhe zyrtarët do të hynë në stadium nga hyrje të ndryshme dhe në orare të ndryshme. Të gjithë do të duhet të mbajnë të veshura dorëza dhe maska mbrojtëse.
