Gjykata e Lezhës ka dhënë sot masën e sigurisë “arrest në burg”, për Agron Lushin të arrestuar pak ditë me parë si bashkëpunëtor në vrasjen e rapsodit Kol Murrani dhe mikut të tij, Preng Simoni, ngjarje e ndodhur më 27 prill në fshatin Lalm Lukaj të Lezhës.
Raportohet se në seancën e zhvilluar me dyer të mbyllura, i akuzuari e ka mohur përfshirjen në këtë krim.
Si motiv për ngjarjen, dyshohet te këtë qenë një konflikt pronësie për një toke are në fshatin Lalm. Nisur nga këto të dhëna u shpall në kërkim si i dyshuar për ngjarjen 41-vjeçari Aleksandër Përdoda, banor i fshatit Lalm, i cili tashmë është arrestuar. Po ashtu policia tha se për ngjarjen dyshohet se Përdoda kishte bashkëpunuar me Agron Lushin të arrestuar pak ditë me parë.
Kol Murrani bashkë me shokun e tij, Preng Simoni kishin dalë që në mëngjes për të shkuar tek shtëpitë e vjetra. Ata u gjetën në një kodër nga i biri i një prej viktimave që ka lajmëruar dhe Policinë.