Disa e kanë konsideruar “vit i mbrapshtë”, “i tmerrshëm” ca të tjerë, “luftë civile” një tjetër grup apo “luftë pa armiq”… Historia e Shqipërisë e ka në radhët e saj më të errëta edhe vitin 1997. As ata që e jetuan, por as ata që e mësuan nga historia e shkruar nuk ia gjetën dot kuptimin. Pse ndodhi?
Nuk ka se si të jetë ndryshe edhe për Mishelin, vajzën e madhe të Blendi Fevziut, e cila nuk ia ka gjetur dot shkakun, as arsyet pse ka ndodhur ai vit i trishtë i shqiptarëve, me gjithë informacionet në libra apo edhe nga ato që mund të ketë mësuar nga i ati.
I ftuar sonte në “Kurthin e Piter Panit”, pas pyetjes se cilat janë pyetjet më të vështira që i kanë bërë vajzat, Blendi u ndal pikërisht këtu: “Në fakt, dje ma bëri vajza pyetjen më të vështirë: “Pse ka ndodhur kjo ’97-a?” më tha. Dhe unë nuk dija si t’i përgjigjesha”, – tha Fevziu i ndier keq.
Jo pyetje më pak të vështirë i bën të atit edhe e vogla, Alis. Ajo bezdiset nga i ati kur e sheh atë gjithmonë duke folur në telefon dhe për këtë e pyet: “Pse flet kaq shumë në telefon?” Edhe kësaj pyetjeje, siç tha Blendi, nuk di si t’i përgjigjet. Por nuk e kundërshton të voglën kur vrapon t’ia marrë të atit telefonin duke i kërkuar me ngulm që vëmendjen ta ketë ndaj saj dhe jo ndaj telefonit.
