Superliga turke ka zgjedhur datën 12 qershor për të rifilluar kampionatin e ndërprerë. Por situata nga Covid-19 në futbollin turk është përkeqësuar ditët e fundit.
Kështu ditën e djeshme, klubi kategorisë së dytë Erzurumspor BB raportoi 11 raste pozitive me coronavirus, ndërsa sot situata është përkeqësuar me Besiktas që është goditur keq nga Covid-19.
Klubi i famshëm turk, ka lajmëruar infektimin e 8 personave. Nuk bëhet e ditur nëse janë të gjithë futbollistë apo pjesëtarë të stafit teknik e klubit. Tekin Kerem Ulku mban postin e doktorit të Besiktas dhe ka deklaruar në një komunikatë zyrtare se të gjithë anëtarët e klubit i janë nënshtruar testeve.
Besiktas renditet në vend të pestë të Superligës turke. Bardhezinjtë numërojnë 44 pikë dhe vendi i parë, që ndahet mes Trabzonspor dhe Basaksehir, ndodhet nëntë pikë larg, kështu që objektivi primar mbetet kualifikimi në Europa League.
