Policia e Tiranës njoftoi sot se ka arrestuar një person të shpallur në kërkim, “me precedent të theksuar kriminal në fushën e narkotikëve, shkatërrimit të pronës me eksploziv dhe të armëmbajtjes pa leje”.
Në pranga është vënë Klajdi Gjeçi, 33 vjeç, lindur dhe banues në Tiranë. Burime zyrtare bëjnë me dije se 33-vjeçari u kap në rrugën “Sami Frashëri”, falë informacioneve të marra në rrugë operative për vendndodhjen e tij.
Ky shtetas ishte shpallur në kërkim nga Drejtoria Vendore Policisë Elbasan, pasi Gjykata e Apelit Durrës, në vitin 2019, i ka vendosur masën e sigurimit personal ”Arrest në burg”, për veprën penale “Prodhim dhe shitja e lëndëve narkotike”. “Veprimet e mëtejshme për ekzekutimin e vendimit të Gjykatës u kryen nga specialistët për Hetimin e Narkotikëve në Drejtorinë Vendore të Policisë Elbasan”, njoftoi policia.
Emri i Klajdi Gjeçit është përmendur disa herë në raportimet e ngjarjeve që lidhen me kronikën e zezë. Në media, është etiketuar si një nga miqtë e Emiljano Shullazit, kreut të grupit “Shullazi”.
Para kësaj të Enjteje, Klajdi Gjeçi është arrestuar për herë të fundit në Prill 2019 nga Policia e Tiranës, i akuzuar si kreu i një grupi që shpërndante kokainë në kryeqytet.
Në janar të vitit 2016, u arrestua pasi vendosi tritol në automjetin e biznesmenit Ndue Rajta, pronarit të një pike intertesh në kryeqytet.
Në vitin 2012 ai është proceduar për armëmbajtje pa leje dhe u lirua pasi Policia nuk kishte marrë leje në Gjykatë për të hyrë në banesë, aty ku iu gjet edhe pistoleta.
Ndërsa në vitin 2015, Klajdi u arrestua për plagosje të rëndë me dashje. Ai u la i lirë 4 muaj më vonë, pasi i dhunuari Enton Nushaj tërhoqi padinë ndaj tij.
Po në vitin 2015, u raportua se Klajdi Gjeçi u mor peng nga tre persona. Gjeçi u dhunua prej tyre dhe u mbajt peng deri sa u zbulua nga policia. Por, i dhunuari dhe autorët e dyshuar dhanë dëshmi kontradiktore në polici, duke rrëfyer se kishin pasur konflikt me një person por ai nuk ishte Klajdi. Më pas edhe Gjeçi tha se nuk i njiuhte personat që e kishin rrëmbyer, dhe këto dëshmi sollën lirimin e të arrestuarve.
Në 8 Dhjetor 2011 Klajdi Gjeçi ka qenë person i dyshuar për vendosjen e eksplozivit në banesën e ish-zv/drejtorit të Policisë së Tiranës Dorian Muça. Policia shkoi për kontroll në banesën e tij dhe e arrestoi për armëmbajtje pa leje. Por Gjykata më pas e la të lirë me arsyetimin se policia duhet të kishte marrë urdhër gjykate për të kontrolluar shtëpinë e të dyshuarit.
Edhe pas prangosjes në Prill 2019, Gjeçi i ka shpëtuar izolimit pas hekurave, për tu arrestuar përsëri në Tiranë.
