Policia e Tiranës njofton se ka ekzekutuar vendimin e sekuestros preventive të pasurisë me vlerë 3.7 milionë euro të dy vëllezërve. Paratë dhe pronat e sekuestruara dyshohet se janë përfituar nga aktivitete kriminale. Dy vëllezërit, Shkëlzen Hoxha, 43 vjeç dhe Edmond Hoxha, 42 vjeç janë të dënuar për vrasje, prostitucion dhe drogë në Belgjikë.
Hetimet
Hetimi ndaj vëllezërve Hoxha ka nisur në vitin 2019 nga Seksioni për Hetimin e Pastrimit të Parave dhe Aseteve Kriminale në Drejtorinë Vendore të Policisë Tiranë për veprat penale “Pastrimi i produkteve të veprës penale ose të veprimtarisë kriminale”. Dosja më pas i kaloi prokurorisë së rrethit.
Pasuritë e sekuestruara
Pasuritë e sekuestruara janë:
- 4 apartamente në Tiranë, 2 apartamente në Sarandë, 1 ambient biznesi trekatësh në Laprakë;
- 1 njësi tregtare, 1 palestër, 7 garazhe dhe dy aktivitete biznesi në Tiranë;
- 4 automjete BMW X5 dhe llogari bankare në euro, usd dhe lekë dhe gjendjen aktuale në këto llogari në tri banka të nivelit të dytë;
“Në funksion të planit operacional ‘Investimi’, në bashkëpunim me Prokurorinë pranë Gjykatës së Shkallës së parë Tiranë po punohet për të identifikuar/zbuluar asete (prona) të tjera që rrjedhin nga aktiviteti kriminal i këtyre shtetasve dhe familjarëve të tyre, të cilat mund t’i kenë në emër të personave të tjerë apo bashkëpunëtorëve në këtë aktivitet kriminal”, njoftoi policia.
Rekordet kriminale
Të njëjtat burime bëjnë me dije se: Shkëlzen Hoxha ka rekorde kriminale në shtetin e Belgjikës, ku ka kryer një vrasje para disa vitesh.
Në vitin 2009 të dy vëllezërit dhe 4 shtetas të tjerë janë arrestuar nga Policia Gjyqësore Federale në Gent, Belgjikë, si pjesëtarë të një grupi kriminal, për veprat penale “Trafikimi i grave për prostitucion” dhe “Substancat narkotike”.
Edmond Hoxha ka rekorde kriminale në shtetin e Belgjikës, ku ka qenë i përfshirë në hetime nga Prokuroria e Gentit/Belgjikë në dosjen “GIRANA” të vitit 2008, për veprat penale “Trafikim i qenieve njerëzore me qëllim shfrytëzimi për prostitucion” dhe “Pjesëmarrje në organizatë kriminale”. Në këtë dosje, Edmond Hoxha ka qenë i dyshuari kryesor dhe është arrestuar në Belgjikë, në datën 02.02.2009. Gjithashtu rezulton se nga viti 2002 deri në vitin 2009, ka qenë i burgosur në Belgjikë, për veprën penale “Trafikim dhe shfrytëzim i prostitucionit”.
