Kjo e hënë nis me lehtësimin e masave kufizuese pas bllokimit prej gati 2 muajsh për shkak të virusit COVID-19.
Nga dita e sotme pjesa më e madhe e territorit shqiptar futet në zonën e gjelbër përveç 6 bashkive: Tiranë, Durrës, Fier, Krujë, Kurbin dhe Shkodër të cilat do të vazhdojnë të mbeten ende zona me risk të lartë infektimi.
Sipas njoftimit të kryeministrit Edi Rama, këto zona do të blindohen me postblloqe dhe nuk do të lejohet hyrja –dalja e automjeteve të autorizuara.
Në zonën e gjelbër, qarkullimi ndërqytetas me automjet privat do të jetë i lirë, me një regjim orar që do të shtrihet deri në orën 21:00. Ndërkohë vazhdojnë të mbeten rregullat në fuqi, duke mos u lejuar grumbullimet me më shumë se 5 veta.
Duke nisur nga dita e sotme, 11 maj, do të rihapen pas një ndërprerje të gjatë nga pandemia dhe të gjitha parukeritë në vend, berberët, klinikat dentare dhe dyqanet në Qendra Tregtare me protokolle strikte sigurie.
Një tjetër ndryshim është edhe me karantimin e të riatdhesuarve, ku nuk do të ketë më hotele karantinë, por të gjithë shqiptarët e ardhur në vendin tonë do të karantinohen në banesat e tyre.
