Mesfushori i Monacos, Cesc Fabregas, është i mendimit që vendimi për t’i dhënë fund sezonit 2019-2020 në Francë ishte i nxituar.
Ndërsa Bundesliga rifillon kampionatin më 16 maj dhe me Premier League, Serie A La Liga që po përpiqen të rikthehen gjithashtu, spanjolli beson autoritetet në Francë duhet të kishin pritur për të marrë vendimin final.
“Ishte një vendim i madh ai që u mor dhe unë e kuptoj këtë. Por ndoshta gjithçka u bë shumë shpejt duke parë që ligat e tjera po përpiqen t’i rikthehen futbollit. Jam i mendimit që duhej të kishim filluar stërvitjet individuale dhe më pas të vlerësonim hapat e mëtejshëm.”
“Megjithatë siç thashë më parë e kuptoj vendimin e marrë sepse më e rëndësishme janë familjet dhe siguria e të gjithë popullatës dhe e mbështes këtë plotësisht.”
Me mbylljen e Ligue 1, Paris Saint-Germain u shpall kampion ndërsa Amiens dhe Toulouse ranë një kategori më poshtë.
