Presidenti Ilir Meta e ka konsideruar të papranueshme dhunën ndaj aktivistëve të shoqërisë civile nga policia gjatë protestës së sotme.
Në një reagim, kreu i Shtetit shprehet se kjo dëmton imazhin dhe besueshmërinë e vendit tonë.
E drejta për të protestuar garantohet nga Kushtetuta, u shpreh Meta, edhe në kushtet e fatkeqësisë natyrore.
“Dhuna ndaj aktivistëve të shoqërisë civile në Sheshin Skënderbej është e papranueshme dhe kremtimi më i shëmtuar për Ditën e Europës, që dëmton jo vetëm kontributet e Shqipërisë gjatë Luftës së Dytë Botërore, por edhe imazhin dhe besueshmërinë e vendit tonë, në përpjekjet për t’u integruar sa më parë në Bashkimin Europian. E drejta e protestës, që është fondamentale për vetë ekzistencën e demokracisë në çfarëdolloj rrethanash e kushtesh, edhe përgjatë gjendjes së fatkeqësisë natyrore, garantohet qartësisht nga Kushtetuta. Kjo është një e drejtë themelore që duhet respektuar në çdo kohë dhe nga çdo autoritet. ZËRI I QYTETARËVE DUHET DËGJUAR!”, shkruan Meta në postim në FB, ku poston dhe një video ku tregohen efektivë policie që tërheqin zvarrë një zonjë, teksa kjo e fundit bërtet.
