Dhuna policore ndaj protestuesve në Tiranë të shoqëruar nga policia ka vijuar dhe brenda ambienteve të komisariatit të policisë, është shprehur avokati Altin Goxhaj.
Ky i fundit ka qenë një nga personat që është shoqëruar nga policia teksa protestonte paqësisht. Në një video të publikuar në rrjetet sociale nga gazetari Almir Shkurti, dëgjohet Goxhaj i cili i mbyllur nga policia brenda ambienteve të komisariatit shprehet se protestuesit e ndaluar janë dhunuar e gjakosur dhe se janë mbyllur në një hapësirë të vogël një numër i konsiderueshëm qytetarësh.
“I kemi kërkuar shefit të Policisë të marrë masa urgjente sepse nuk mund të qëndrojmë 5 veta në 5 metra katrorë. Është tentativë për vrasje. Policët kanë goditur me grushte, kanë gjakosur njerëz. As shërbim shëndetësor, as gjë”, dëgjohet të thotë avokati.
Bashkë me videon e postuar gazetari Shkurti ironizon dhe liderin e opozitës Lulzim Basha dhe Presidentin Ilir Meta, të cilët janë mjaftuar me reagime në rrjete sociale e prononcime për gazetarët lidhur me ngjarjen.
“Thirrje nga brenda Komisariatit!! Avokati Altin Goxhaj thotë se janë 14 vetë në 5 m katror. I kanë GODITUR dhe GJAKOSUR!!
Policët konfirmojnë se kanë arrestuar edhe kalimtarë krejt pa lidhje me ngjarjen!!!
Rrini në shtëpi! Gjum të ëmbël!!! Sidomos Luli me gjithë Lir Shqiponjën!!”, shkruan Shkurti në komentin që shoqëron videon e postuar në FB.
Këtë të shtunë dhjetëra qytetarë u dhunuan dhe u shoqëruan me forcë nga policia pasi dolën në protestë në mbrojtje të Teatrit Kombëtar, që një ditë më parë, me vendim qeverie, i kaloi në pronësi të Bashkisë së Tiranës. Kreu i bashkisë Erion Veliaj është zotuar publikisht se do të shembë godinën e teatrit.
