Kontrata e Elseid Hysaj-t me skuadrën e Napolit skadon në verën e vitit 2021 dhe për të nuk do të ketë një rinovim të mëtejshëm. Pikërisht këtë ka pohuar agjenti i mbrojtësit, Mario Giuffredi.
Agjenti italian, në një prononcim për Radio Kiss Kiss, ka deklaruar:
“Ia kemi bërë të qartë Napolit dhe presidentit De Laurentiis, që nuk do të rinovojmë kontratën. Vullneti ynë është largimi nga Napoli. I kemi komunikuar këtë vendim 15-20 ditë më parë, tani është në interesin e klubit të kërkojë një zgjidhje për lojtarin”.
“Gjithçka mund të ndodhë në këtë merkato të çuditshme, kështu që gjithçka mund të ndryshojë gjatë rrugës. Gjithsesi, ne ia kemi shprehur dëshirën dhe vullnetin tonë presidentit të Napolit”, deklaron Mario Giuffredi.
