Një plagosje me thikë ka ndodhur në kryeqytet, njoftoi këtë të mërkurë policia e Tiranës, ndërsa autori, një 45-vjecar, është vënë në pranga. Ky i fundit qëlloi me thikë kunatin, i cili po merr mjekim në spital.
“Shërbimet e Komisariatit të Policisë Nr. 2, pas njoftimit të marrë se në rrugën ‘Emin Duraku’ kishte konflikt mes dy shtetasve, ku një prej tyre kishte goditur me thikë shtetasin tjetër, kanë shkuar menjëherë në adresën e dhënë. Në momentin që shërbimet e Policisë janë afruar në vendin e ngjarjes, shtetasi R.R., 45 vjeç, është larguar me shpejtësi. Në ndjekje të tij janë vënë forca të shumta të Komisariatit të Policisë Nr. 2 dhe pas disa orë ndjekjeje dhe kontrollesh kanë bërë të mundur kapjen e tij. Në përfundim të veprimeve u bë arrestimi i shtetasit R. R., pasi gjatë një konflikti për motive të dobëta goditi me thikë kunatin e tij shtetasi A.B.”, njoftoi policia.
Ndaj autorit, janë ngritur akuzat për veprat penale “Vrasje me dashje” e mbetur në tentativë, “Dhuna në familje” dhe “Mbajtja pa leje e armëve të ftohta”.
