Kalimi i Bruno Fernandes te Manchester United ka futur në “sherr” dy ish-ekipet e portugezit, Sampdorian dhe Sportingun e Lisbonës. Fernandes kaloi një sezon në Itali para se të transferohej te Sporting në verën e vitit 2017.
Kështu gazeta “Il Secolo XIX” bën të ditur se Sportingu duhet t’i paguajë Sampdorias 4.6 milionë euro, e ndarë kjo në tre këste. Por siç vijon më tej raportimi, klubi Italian ende nuk ka marrë këstin e parë.
Kjo e ka shtyrë Sampdorian të kërkojë ndihmën e FIFA-s, megjithëse skuadra e Sporting-ut pohon se ata nuk i detyrohen asgjë askujt, pasi 26-vjeçari nënshkroi një kontratë të re në 2018.
“Ne mund ta konfirmojnë se më 3 prill të këtij viti, klubi italian Sampdoria bëri ankesë në FIFA kundër klubit portugez Sporting Clube de Portugal, lidhur me disa obligime financiare në kontratën korresponduese për transferimin e futbollistit portugez, Bruno Miguel Borges Fernandes”, ka thënë një zëdhënës i FIFA-s.
“Çështja është duke u hetuar për momentin dhe për këtë arsye ne nuk mund të komentojmë më tutje për këtë gjë”.
Djajtë e Kuq firmosën me Bruno Fernandez për 46.5 milionë euro, të cilat mund të rriten në 80 milionë euro në varësi të shpërblimeve.
