Kryeministri Edi Rama i referohet shpesh herë se vendimet i merr Komiteti i Ekspertëve në lidhje me situatën e COVID-19 dhe jo ai, por gati më shumë se dy muajsh askush nuk e dinte se kush ishte ky Komitetet Ekspertësh dhe kush ishte drejtuesi i saj.
Madje emrin e drejtuesit nuk e dinte as mjeku Pëllumb Pipero kur u pyet në një studio televizive para dy ditësh.
Më në fund këtë emër e ka zbuluar ministrja e Shëndetësisë, Ogerta Manasitrliu, e cila ka deklaruar se në krye të Komitetit të Ekspertëve është zv/ministrja e Shëndetësisë, Mira Rakacolli.
Manastirliu gjatë një interviste për emisionin “Në fokus”, në TvT theksoi dhe se ka edhe grupe teknikësh që asistojnë me përgatitjen e strategjive që duhen ndjekur për COVID-19.
“Komiteti i ekspertëve drejtohet nga zëvendësministrja e Shëndetësisë, profesoreshë Mira Rakacolli, dhe ka në përbërje ekspertë të ndryshëm të fushave të ndryshme. Nga ana tjetër ka edhe grupe teknikësh që asistojnë me përgatitjen e strategjive tona”, tha Manastirliu.
