Shkarkohet nga detyra efektivi i policisë që në krye të detyrës ka bërë veprime të turpshme, duke prekur një vajzë nga të pasmet. Video e ngjarjes u publikua një ditë më parë në rrjetet sociale e media, ndërsa këtë të Hënë, Policia e Shtetit njoftoi shkarkimin nga detyra të efektivit të policisë, pjesë e komisariatit 3 në kryeqytet.
“Pas publikimit të një videoje në rrjetet sociale, ku shfaqet një punonjës policie që ka shkelur rëndë Kodin e Etikës dhe Rregulloren e Policisë së Shtetit, duke cenuar imazhin e Policisë, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale në Policinë e Shtetit dhe Drejtorinë Vendore të Policisë Tiranë për të filluar menjëherë hetimin disiplinor.
Drejtoria e Standardeve Profesionale dhe DVP Tiranë, pas verifikimeve të kryera dhe hetimit të bërë, identifikuan punonjësin e Policisë, i cili është shtetasi M. K, punonjës i Patrullës së Përgjithshme të Komisariatit të Policisë Nr. 3.
Për këtë punonjës u bë pezullimi nga detyra dhe u mor masa e përjashtimit nga Policia e Shtetit, për shkelje të rëndë të Rregullores së Policisë së Shtetit”, njofton Policia.
Policia e Shtetit shton se “dënon ashpër veprime të tilla që cenojnë imazhin e Policisë tek qytetarët dhe fton cilindo që të denoncojë çdo rast të cenimit të figurës së punonjësve të Policisë apo të abuzimit me detyrën, duke u garantuar reagim të menjëhershëm e të paanshëm”.
Skandali/ Polici me uniformë prek vajzën nga të pasmet në mes të rrugës (VIDEO)
