Lojtari i Bylisit, Ditmar Bicaj në një intervistë të fundit ka deklaruar që futbolli shqiptar është lënë në mëshirë të fatit nga ana e qeverisë duke u shprehur se nuk ka asnjë lloj ndihme.
I ftuar në “Ora Sport” gjithashtu ai është shprehur se sindikata e futbollistëve ku dhe ai bën pjesë i kanë bërë kërkesë qeverisë për ndihmë ndaj futbollistëve por që nuk ka pasur asnjë përgjigje.
31-vjeçari nuk ka ngurruar të bëjë edhe deklarata ironizuese, i cili duke ditur që kryeministri, Rama, bën tifo për Juventusin, ka thënë se në Shqipëri më shumë vëmendje i kushtohet merkatos së Juventusit, se sa halleve të futbollit shqiptar.
“Ne kemi bërë stërvitje të ndryshme. Mundohemi të bëjmë aktivitet, mblidhemi disa vetë dhe zhvillojmë ushtrime të ndryshme dhe me biçikletë. Duke qenë se parku i liqenit ka qenë i mbyllur, ne kemi kërkuar stërvitjen atje por ka qenë e pamundur. E vetmja zgjidhje ka qenë me biçikleta. Unë dhe Osmani jemi tek sindikata e futbollistëve dhe kemi pasur një bashkëbisedim me presidentin.”
“Është Andi Lila. Kemi bërë dhe kërkesë qeverisë për ndihmë për futbollistët e cila ka kaluar në vesh të shurdhët. Kur shikon nëpër rrjete sociale që janë shumë të shqetësuar për merkaton që do të bëjë Juventusi, shikojmë me logon e Juves nuk na vjen mirë. Në këto krize nuk e dimë se çfarë shtetasi jemi në rradhë të parë. A jam shqiptar apo jam malazes. Unë di që shteti shqiptar i paguaj taksat si futbollist dhe si qytetar.”
“Duke parë në këto momente, e duke biseduar me miq në vende të ndryshme në rajon që shteti u është përgjigjur me një shumë sadopak simbolike, këtu në Shqipëri është shumë e dhimbshme dhe nuk të ndihmon fare.”
