Ministrja e Infrastrukturës, Belinda Balluku, njoftoi sot se të gjithë shqiptarët që do të riatdhesohen në atdhe prej datës 4 maj, do të vetëkarantinohen në hotele ose në banesat e tyre për 14 ditë.
Balluku tha se banorët që jetojnë në zonat e gjelbërta do të karantinohen në hotele, ndërsa ato që jetojnë në zonat e tjera do të karantinohen në shtëpitë e tyre.
Sipas ministres së Infrastrukturës, çdo qytetar ka të detyrueshme të plotësojë formularin e vetëdeklarimit, ku përfshihet adresa e saktë dhe do të mbajnë përgjegjësi ligjore.
“Qytetarët që do të qëndrojnë në hotele do të paguajnë vetëm tarifën prej 7 eurosh për ushqimin”, tha Balluku.
Në mesazhin e saj, Balluku ka kërkuar vëmendje ndaj qytetarëve që kërkojnë riatdhesimet, duke respektuar masat.
“Deklaroni adresën e banimit. Kush banon në zona të gjelbërta duhet të rrijë në hotel. Kush banon në zonat e kuqe do të karantinohen në banesat e tyre nën monitorimin e policisë.
Gjatë udhëtimit me Air Albania do plotësoni një formular vëtëdeklarimi, në rast deklarim të rremë do të aplikohen masa ndëshkimi në bazë të ligjeve në fuqi. Në aeroport, personat që jetojnë në zona të gjelbërta do dërgohen në hotel me autobus. Do paguajnë vetëm 7 euro për ushqimin.
Kemi luftuar këto 8 javët e gjata me armikun e padukshëm. Ia kemi dalë jo vetëm falë angazhimit të qeverisë por edhe pse ju keni treguar përgjegjshmëri. Edhe sot kërkohet përgjegjshmëri nga ju për mënyrën e rë të riatdhesimit.
Ditët që po vijnë padyshim do të jenë më të mira se ato që kaluam por vetëm nëse zbatojmë protokollet dhe rregullat e shpallura nga qeveria”, tha Balluku.
