Deputeti Andi Përmeti është shprehur kundër propozimit të ish ministrit të Shëndetësisë Ilir Beqaj për uljen e pensioneve.
Gjatë fjalës në Kuvend, deputeti foli me ironi kur i kërkoi kryeministrit Edi Rama të shtojë tjetër masë për deputetët: një mjek psikiatër. “Koha e karantinës është e vështirë, ky deputet ka patur çrregullime në pamjen e tij në fytyrë. E dëgjon që propozon uljen e pensioneve, zoti Beqaj keni nevojë për kurim urgjent. Është e frikshme të bësh këtë propozim në këtë kohë, duhet të jesh o i çmendur, o i pashpirt”, tha Përmeti nga foltorja e Kuvendit.
Menjëherë pas tij, replikoi Beqaj duke thënë se ka propozuar ulje pensionesh për disa raste specifike.
“Nuk jam marrë me pensionistët fare, por propozimi im ishte që pensioni i Petrit Vasilit të mos marrë 800 mijë lekë, por mbi 600 mijë, pse është i pamoralshëm, Klajda Gjosha pse të marrë 900 mijë lekë, por 670 mijë, pse qenka kriminale dhe të gjitha pagat e luftës nuk do preken”, tha Beqaj.
“Po kështu, çdo pension suplementar e shtesë pensioni suplementar (nëpunës i lartë shtetëror, ushtarak në lirim, profesor etj.) për tetë muajt e mbetur të vitit, të marrë 75 % të këstit mujor të muajit prill 2020”, shprehej Beqaj më herët në propozimin e tij, ku hodhi si ide dhe uljen e pagave.
Ish ministri në fakt është bërë shënjestër për këto deklarata, për të cilat është thënë se ka qenë një porosi nga kryeministri Edi Rama për të testuar pranimin e tyre në publik. Vetëm kreu i qeverisë, publikisht u distancua nga kjo ide. Një ditë më parë, Rama tha se për asnjë arsye pagat dhe pensionet nuk do të ulen.
