Ministria e Mbrojtjes ka deklaruar lidhur me tre efektivë të ushtrisë shqiptare që kanë dalë pozitivë ndaj COVID-19.
Efektivët janë pjesë e misionit të KFOR në Kosovë, ku Forcat e Armatosura Shqiptare kanë 29 ushtarakë. Sipas Ministrisë, ushtarakët nuk shfaqin “shenja problematike” për shëndetin e tyre, dhe sipas udhëzimit të NATO-s, janë riatdhesuar. Ndërkohë, shton se pjesa tjetër e kontingjentit shqiptar gëzon shëndet të plotë.
“Ministria e Mbrojtjes bën me dije se, 3 efektivë të Forcave të Armatosura, pjesë e operacionit të KFOR (Kosovë) kanë dalë pozitivë ndaj COVID – 19. 3 efektivët janë infektuar gjatë kryerjes së detyrës në misionin e KFOR dhe janë pjesë e kontributit prej 29 efektivësh të FA në këtë operacion. Sipas udhëzimit të NATO, gjatë operacioneve (misioneve), nëse personeli ushtarak, përfaqësues i një prej vendeve anëtare të Aleancës, del pozitiv me COVID-19 duhet të riatdhesohet. Nisur nga kjo direktivë e NATO, Ministria e Mbrojtjes dhe Shtabi i Përgjithshëm i Forcave të Armatosura morën masa për kthimin në atdhe dhe trajtimin e 3 efektivëve sipas protokollit të vendosur nga Ministria e Shëndetësisë dhe Mbrojtjes Sociale. Nga kontaktet e deritanishme, 3 efektivët nuk kanë shfaqur shenja problematike për shëndetin e tyre. Bëjmë me dije se pjesa tjetër e kontingjentit të FA në misionin KFOR, deri më tani gëzon shëndet të plotë”, thuhet në një njoftim të ministrisë.
