Janë mësuar detajet nga rasti i ri me COVID-19 në qytetin e Beratit të raportuar mesditën e sotme nga autoritet e shëndetësisë
Mësohet se i infektuar është një 13-vjeçar nga fshati Kostren që rezulton të jetë vëllai i 16-vjeçares M.SH. që rezultoi e prekur me Covid-19 disa ditë më parë.
Ai iu nënshtruan testit menjëherë pasi u zbulua se motra e tij ishte e infektuar. Ndërkohë priten përgjigjet e tamponëve të dy prindërve dhe gjyshes së vajzës.
13-vjeçari nuk ka shfaqur shenja të rënda të sëmundjes, përveç një temperature deri në 38 gradë gjatë dy ditëve të fundit.
Punonjësit e bashkisë së Beratit kanë kryer dezinfektimin e banesës dhe gjithë territorit të fshatit Kostren, ndërkohë që mjekët epidemiologë kanë kryer gjatë këtyre ditëve edhe hetimet në lidhje me kontaktet e vajzës dhe djalit.
Rasti i sotëm e çon në 3, numrin e të prekurve me Covid-19 në rrethin e Beratit, pas rasteve të 44-vjeçares nga fshati Rroshnik dhe 16-vjeçares nga fshati Kostren, ndërkohë që 3 javë më parë u regjistruar edhe rasti i parë në qytetin e Poliçanit, një 79-vjeçar.
