Ministri italian i Sporteve, Vincezo Spadafora, ka reaguar pas deklaratave të bëra nga drejtori sportiv i Lazios, Igli Tare.
Ditën e djeshme ish-sulmuesi i kombëtares shqiptare, në lidhje me mungesën e një vendimmarrje të qartë për kampionatin e Serie A, ka dalë qartë kundër Ministrit Spadafora, duke thënë:
“Dje (ditën e diel) dëgjova Ministrin e Sportit duke thënë që ai respekton shëndetin e lojtarëve, por në të njëjtën kohë ai i ka dhënë mundësinë futbollistëve të stërviten në parqe publike në mesin e njerëzve ku distanca e sigurisë mund të mos respektohet. Kemi qëndruar për dy muaj pushim, nuk e di se çfarë ka në mendje Ministri, nuk e di cili është qëllimi i tij. Ai sigurisht nuk dëshiron të ndihmojë futbollin, ai nuk dëshiron që ne të luajmë. E them këtë me përgjegjshmëri dhe me vetëdije për situatën e vështirë që kemi kaluar dhe me të cilën do të duhet të përballemi. Duhet të jesh shumë i kujdesshëm, por këtu ka diçka të gabuar”. u shpreh Tare një ditë më parë.
Ndaj kësaj deklarate nuk ka vonuar dhe reagimi i Vincenzo Spadafora:
“Të rifillojmë stërvitjet nuk do të thotë që do të rifillojmë edhe kampionatin. FIGC dëshiron të rifillojmë në mesin e qershorit por nuk jemi në gjendje të themi se si do të evoluoj virusi. Është e pamundur të caktojmë që tani një datë se kur mund të rifilloj kampionati. Komplot kundër futbollit? Kushdo që e ka thënë është po aq qesharak sa vetë deklarata, unë lëviz vetëm duke respektuar rregullat”, u shpreh Ministri i Sporteve.
