Anulimi i kampionatit në Holandë dhe lënia vakant e titullit kampion ka shkaktuar pakënaqësi te futbollisti i Ajaksit Hakim Zieyech i cili e ka mbyllur përpara kohe aventurën me harkëtarët pasi sezonin e ardhshëm do të jetë pjesë e Chelsea-t.
Në një intervistë për mediat holandeze, marokeni ka shpërthyer ndaj vendimit të federatës holandeze për të përfunduar përpara kohe sezonin dhe për të mos ja dhënë Ajaksit titullin kampion me skuadrën e Ten Hag që kryesonte me pikë të barabarta me AZ Alkmaar por qëndronte në vend të parë falë goleavarazhit më të mirë.
“Kam dëgjuar shumë gjëra të pakëndshme, të pavërteta. Njerëz që thonë se AZ e meriton titullin, pasi na kanë mundur 2 herë. I bie që golaverazhi nuk ka vlerë? Nuk llogaritet? Gjepura! Ajaxi është kampion. Si e fitoi PSV titullin në 2007? Me një gol më shumë diferencë. Ne nuk jemi zyrtarisht kampionët, por e dimë shumë mirë, të gjithë, se kampionët e këtij sezoni jemi ne”.
Duke folur për transferimin e tij te skuadra e Chelsea-t dhe për faktin që tashmë pasi sezoni në Holandë ai nuk do të ketë më mundësinë të luajë për Ajaksin, ai shtoi:
“Nuk e mendoja se do të kisha luajtur ndeshjen e fundit për skuadrën e Ajaksit. Sapo filluam ta merrnim veten për sa i përket rezultateve në fushën e lojës dhe më pas coronavirusi ndryshoi gjithçka. Është me të vërtetë çmenduri dhe të duhet pak kohë të mësohesh me këtë fakt”. – përfundoi Ziyech.
