Kurba epidemiologjike e personave të prekur me koronavirus është e qëndrueshme. Ekspertja e Institutit të Shëndetit Publik, Rovena Daja në një intervistë për RTV Ora tha se vendi ynë nuk do të ketë një pikë të COVID-19.
Daja shpreson që kurba të vazhdojë të qëndrojë konstante derisa të fillojë të ulet.
Rovena Daja: Kurba epidemiologjike për shkak të masave që janë marrë ka një trend relativisht të qëndrueshme. Mos prisni që të ketë numër të barabartë rastesh çdo ditë. Normalisht një ditë mund të ketë më shumë raste, një ditë më pak. Gjatë 24 orëve të fundit është e vërtetë që kemi pasur më shumë raste, por ndoshta gjatë 24 orëve që jemi duke kryer analizat mund të kemi një numër më të vogël rastesh. Normalisht ne nuk kemi një kurbë normale të një pandemie sepse kemi marrë disa masa izolimi. Duke marrë këto masa nuk kemi një pikë, por kemi një trend të qëndrueshëm. Sipas specialistëve ne nuk do të kemi një pikë dhe unë shpresoj mos kemi një pikë, por të vazhdojë ky numër i qëndrueshëm rastesh ulje rritje derisa të fillojë të ulet.
Referuar situatës epidemiologjike, Daja tha se task forca ka vendosur të hapë disa biznese.
Rovena Daja: Duke parë situatën epidemiologjike task forca ka vendosur që të hapen disa pjesë të ekonomisë. Ne do vazhdojmë të jemi akoma më shumë vigjilente. Do të shikojmë në perspektivë se çfarë do të ndodhë.
Qytetarët tha ajo janë ndërgjegjësuar, por përsëri apeli mbetet i njëjtë.
Rovena Daja: Qytetarët duhet të zbatojnë masat e distancimit fizik. Të përdorin maskat, të dezinfektojnë duart dhe të jenë vigjilent. Shqiptarët janë ndërgjegjësuar, qytetet janë të boshatisura dhe them se njerëzit po na ndihmojnë në këto momente
