Pasditen e djeshme, La Liga, organizoi një takim me mjekë nga klubet e kategorisë së parë dhe të dytë në Spanjë, për t’i njoftuar që të bëhen gati për rifillimin e seancave stërvitore, pavarësisht ankesave nga futbollistë dhe trajnerë ditët e fundit.
Ata gjithashtu sqaruan se ata vazhdojnë me planin për të izoluar lojtarët në hotele dhe në ambientet sportive të klubeve për 15 ditë para fillimit të sezonit. Në këtë takim u njoftua se në datën 28 prill do të fillojnë testet për coronavirus te çdo futbollist, në përpjekje për të kontrolluar plotësisht koronavirusin.
LaLiga u ka komunikuar mjekëve se ata kanë kontraktuar një kompani private SYNLAB, për të kryer testet. Së pari, do të kryhen testet PCR për antitrupat dhe më pas ata do të bëjnë testimin virusologjik (tampon).
Në fakt, siç raporton gazetari, Isaac Fouto për “Cope”, mjekët kanë kërkuar listat e të gjithë personave që duhet të testohen menjëherë. Ideja është që në Spanjë të fillojnë seancat stërvitore në javën e dytë të majit.
LaLiga ka planifikuar gjithashtu që ditën e nesërme, të mbajë një takim me Shoqatën e Futbollistëve në Spanjë (AFE) për të diskutuar gjithçka që lidhet me testet dhe kthimin e mundshëm në stërvitje.
