Një burrë nga Britania që luftoi me koronavirusin në trajtim intensiv ka zbuluar sekretin e ushtrimeve të fryëmarrjes që ndikuan tek përmirësimi i tij.
Rob Thomas, 59 vjeç, ka marrë nofkën “mbreti i frymëmarrjes” pasi iu nënshtrua një trajtimi në spitalin Gloucestershire.
Të dielën ia doli që të dilte nga spitali dhe videoja e tij ku shfaqet me lot në sy duke përqafuar gruan Viv është bërë virale. Rob i përshkroi momentet e tij në kujdesin intensiv si “shumë të izoluara”. Në atë kohë, mjekët i thanë familjes së tij se ai kishte vetëm 50% mundësi për të mbijetuar.
Por falë një teknike të frymëmarrjes, ia doli të mbijetonte.
Në një intervistë për “Goof Morning Britain”, shpjegoi se motra e tij, një infermiere, i tha që të vazhdojë të marrë frymë pasi u pranua në trajtim intensiv.
Për këtë Rob thotë: “I mora ato fjalë me vete. Në trajtim intensiv, kjo ishte gjithçka bëra. Ulesha aty dhe shihja orën dhe bëja frymëmarrje të thellë. Mjekët mendojnë se kjo frymëmarrje e thellë më ka ndihmuar që të mos përdor ventilator.”
