Zhuljen Varfaj, kryetari i komanduar i Bashkisë së Durrësit, është dorëhequr për arsye shëndetësore. Varfaj njihet si njeri i ish-kryetarit Vangjush Dako, që vazhdon të influencojë Bashkinë dhe PS-në e qytetit bregdetar.
“Do të dëshiroja të falenderoja dhe të vlerësoja me mirënjohje Këshillin Bashkiak të Durrësit për besimin dhe mbështetjen e dhënë nga çdo anëtar i tij, bashkëpunëtore e bashkëpunëtorë të mi të administratës së Bashkisë Durrës, që në këtë periudhë të vështirësive të mëdha për Durrësin kanë dhënë dhe bërë më të mirën e tyre në zgjidhjen e shumë problematikave dhe kërkesave të qytetarëve të Durrësit”, shkruan Varfaj.
Edhe më parë është përfolur dorëheqja e Kryebashkiakut Varfaj, por Bashkia e Durrësit e ka përgënjeshtruar në atë kohë.
“Kryetari i bashkisë vijon të jetë në detyrë dhe nuk ka asnjë vendim për dorëheqjen e tij”, tha në fillim të marsit Bashkia e Durrësit.
Varfaj u emërua në krye të bashkisë nga Këshilli Bashkiak Durrës pas dorëheqjes së papritur të ish-kryetares Valbona Sako në fillim të dhjetorit, pas tërmetit vdekjeprurës që la 51 viktima dhe qindra të plagosur. Dorëheqja e Sakos u shoqërua më një valë largimesh në bashkinë e Durrësit.
Nënkryetarja Etleva Kondi dhe drejtoresha e kabinetit, Keli Kërtusha dhanë dorëheqjen pas Sakos. Kërtusha u zëvendësua në janar nga Rovena Rozhani, deri në atë kohë zëdhënëse për mediat në Ministrinë e Turizmit dhe Mjedisit.
Kërkesa e dorëheqjes
Sot me dt 23.04.2020, Unë Zhuljen Ago Varfaj,
Me detyrë Zëvendës Kryetar i Bashkisë Durrës i emëruar me vendim të Këshillit Bashkiak Durrës nr-dt- për të ushtruar detyrat si dhe funksionet e Kryetarit të Bashkisë së Durrësit, i gjendur para një situate krejtësisht të pafavorshme, madje me rrezik të shtuar për shëndetin tim, parashtroj dhe jap dorhëheqjen time të parevokueshme nga detyra dhe funksionet e ngarkuara.
Do të dëshiroja të falenderoja dhe të vlerësoja me mirënjohje Këshillin Bashkiak të Durrësit për besimin dhe mbështetjen e dhënë nga çdo anëtar i tij, bashkëpunëtore e bashkëpunëtorë të mi të administratës së Bashkisë Durrës, që në këtë periudhë të vështirësive të mëdha për Durrësin kanë dhënë dhe bërë më të mirën e tyre në zgjidhjen e shumë problematikave dhe kërkesave të qytetarëve të Durrësit.
Me respekt, Zv/Kryetar, Zhuljen VARFAJ
