Emirjana Sako, kryetarja e emëruar sot në krye të Bashkisë së Durrësit, me një votim on-line të Këshillit Bashkiak, ka qënë edhe më parë zyrtare e kësaj njësie vendore, e dyta më e madhja në Shqipëri. Para pak javësh, i dorëhequri, Varfaj, ishte jashtë vendit për një ndëhyrje kirurgjikale, dhe pikërisht Sako e zëvendësoi. Ajo ndërkohë, ishte e komanduar nënkryetare bashkie.
Me kthimin në Shqipëri dhe në Durrës, pas trajtimit mjekësor, Varfaj mori sërish drejtimin e Bashkisë, dhe Sako u rikthye në detyrën e mëparshme.
Por, sot përsëri, posti i kreut të Bashkisë së Durrësit mbeti vakant, pas dorëheqjes zyrtare të zotit Varfaj, i cili e motivoi këtë lëvizje me arsyet shëndetësore. Sako ka qënë për shumë kohë drejtoreshë e shërbimeve në këtë bashki, kur kjo drejtohej nga Vangjush Dako. Me këtë lëvizje, njohës të mirë të korenteve politike dhe të pushtetit në qytetin port, thonë se sërish fuqizohet Dako.
