Plot 142 miliardë dollarë më pak. Paratë e dërguara nga punëtorët migrantë në vendet e tyre – një burim kritik i mbështetjes ekonomike për botën në zhvillim – parashikohet të bien mbi 25% këtë vit për shkak të krizës ekonomike të shkaktuar nga pandemia e koronavirusit, thotë Banka Botërore. Sipas Bankës Botërore: “Dërgesat globale pritet të bien në 572 miliardë dollarë në vitin 2020, nga 714 miliardë dollarë vitin e kaluar”.
Një rënie e tillë do të ndryshonte rritjen e fortë të dërgesave në para përgjatë viteve të fundit, kur ekonomia globale është bërë gjithnjë e më e varur nga puna e emigrantëve. “Me ndikimin e pandemisë së koronavirusit që pritet të shkaktojë një recesion global, remitancat po përballen me rënien e tyre më të thellë në histori”, thotë Banka Botërore. Dërgesat e emigrantëve shërbejnë si një mundësi shpëtimi për vendet me të ardhura të ulëta dhe të mesme, duke siguruar burimin më të madh të jetesës për shumë njerëz.
Ndikimi afatgjatë i krizës aktuale ekonomike mbi punëtorët migrantë dhe dërgesat e tyre nuk është ende i qartë. Gjatë krizës financiare të 2008-2010, remitancat ranë me vetëm 5%, por më pas u rritën shpejt. “Remitancat janë shumë të prekshme në situatën aktuale,” tha Dilip Ratha, kryekonomisti i Bankës Botërore për migracionin dhe remitancat.
Në nivel global, numri I emigrantëve është më i lartë se kurrë më parë, kjo edhe për shkak të rritjes së globalizmit ekonomik. Si rezultat, disa vende mbështeten gjithnjë e më shumë në paratë e dërguara në shtëpi nga emigrantët e tyre që punojnë jashtë vendit. Në vitin 2019, flukset e dërgesave në vendet me të ardhura të ulëta dhe të mesme tejkaluan investimet e huaja direkte, sipas Bankës Botërore. “Remitancat kanë luajtur një rol kryesor në luftën kundër varfërisë dhe shpesh kanë vepruar si një burim lehtësimi për rastet e fatkeqësive natyrore dhe rënies ekonomike,” tha z. Ratha.
Këtë muaj, Oxfam ka paralajmëruar se pandemia e koronavirusit mund të zhysë deri në gjysmë miliardë njerëz në botën në zhvillim në varfëri. India merr sasinë më të madhe të dërgesave, me 83 miliardë dollarë në total. Kjo shumë parashikohet të bjerë 23% këtë vit. Rënia e remitancave pritet të jetë më e mprehta në vendet në zhvillim në të gjithë Evropën dhe Azinë Qendrore, rajone për të cilat Banka Botërore parashikon një rënie prej 27.5%. /WSJ
