Mbrojtësi legjendar, Roberto Carlos ka zbuluar se largimi i tij nga “San Siro” për te Real Madrid ka ndodhur shumë shpejt, pas mosmarrëveshjes që kishte pasur për pozitën e tij më të mirë në formacion.
Me trajnerin anglez Roy Hodgson në krye të zikaltërve në atë kohë, Carlos zbuloi se ai e organizoi largimin e tij nga San Siro shumë shpejt, pasi iu bë e qartë se ai s’do të luante më në pozitën e tij të preferuar si mbrojtës i krahut të majtë.
“Unë luajta në krah te Interi. Problemi është që në shtatë ndeshjet e para shënova shtatë gola. Ata më vendosën më përpara në sulm në Itali në vitin 1995 dhe unë vuajta shumë për shkak të kësaj”.
“Unë fola me presidentin e Interit, Massimo Morattin, dhe i thashë atij se nuk mund të luaja më në atë pozitë sepse brenda tre muajsh e kisha Kupën e Amerikës”.
“Atë ditë e pata një takim me presidentin e Real Madridit, Lorenzo Sanz, dhe brenda 10 minutave u largova dhe erdha në Madrid. Në atë kohë, gjërat bëheshin shumë shpejt”. – ka thënë braziliani në Instagram.
