Presidenti Ilir Meta, kryeministri Edi Rama dhe kreu i PD-së, Lulzim Basha, kanë dhënë mesazhe ngushëlluese për ndarjen nga jeta të aktorit të mirënjohur Rikard Larja.
Presidenti Ilir Meta ka shprehur hidhërimin e tij për ndarjen nga jeta të personalitetit të kinematografisë shqiptare, Rikard Ljarjës.
Në një mesazh në rrjetet sociale, Meta shpreh vlerësimin më të lartë për njeriun e madh të skenës: “I hidhëruar nga lajmi për ndarjen nga jeta të aktorit të madh, skenaristit e regjisorit të mirënjohur, Rikard Ljarja.
“Pa fjalë nga dhimbja për këtë humbje të madhe e të pazëvendësueshme, jo vetëm për familjen e Tij, për teatrin dhe kinematografinë shqipare, por për të gjithë brezat që u rritën dhe duartrokitën talentin e veçantë dhe personazhet e paharruara të luajtura mjeshtërisht prej Tij.
Si një përfaqësues tipik i një brezi idealistësh me shpirt krijues, të cilët aq shumë e deshën artin dhe Shqipërinë, ky largim në amëshim i Rikardit të madh na ka pikëlluar të gjithëve!”, shkruan Meta
“Lamtumirë mik”, shkruan Rama në një postim në rrjet, ndërsa ka publikuar foton e “Dedës”, një prej roleve më të njohur të aktorit në filmin ‘Rrugë të Bardhë”.
Kryetari i opozitës Lulzim Basha i ka shprehur ngushëllimet familjes Ljarja për ndarjen nga jeta të artistit të madh Rikard Ljarja. Në një shënim në rrjetet sociale, Basha shpreh konsideratat më të larta për këtë personalitet të kinematografisë, i cili, siç e thekson, “me punën e tij ndriçoi për vite me radhë errësirën e kobshme të regjimit të kaluar.”
“Rikard Ljarja ishte dhe do të mbetet artisti i madh që mbushi zemrat e shqiptarëve për dekada me radhë. Ndarja e tij nga jeta është një lajm i trishtuar jo vetëm për brezat që u rritën me personazhet e filmave të tij, por dhe për më të rinjtë që humbën një pasuri kombëtare të artit dhe kinematografisë.
Në këtë ditë të vështirë për familjen Ljarja i shpreh ngushëllimet e mia të sinqerta bashkëshortes së tij znj. Marjeta Ljarja dhe familjes së aktorit tonë të dashur, si dhe kolegëve e miqve të tij në botën e artit”, shkruan Basha.
