Shqipëria e ka kaluar pikun e pandemisë së korionavirusit të ri në ditët e para të muajit prill.
I këtij mendimi është mjeku i spitalit Covid 2 “Shefqet Ndroqi, Arben Tanka.
Në një intervistë për Ora News ai tha se momentalisht kemi arritur në rrafshimin e kurbës dhe në ditët në vijim rastet do të vinë në rënie.
Tanka: Mendoj se piku i kësaj sëmundje mund të ketë filluar në fund të muajit mars dhe në ditët e para të muajit prill. Jemi në kurbën e rrafshët të kësaj sëmundje dhe në ditët në vijim do të vijë duke u ulur. Tirana sot ka pasur zero raste. Kanë mbetur vetëm dy vatra, Kruja dhe Kurbini.
Lidhur me testimet, ai vlerëson strategjinë e ndjekur deri tani.
Tanka: Strategjia që është ndjekur deri tani me gjurmimin e rasteve që dalin pozitive dhe kontaktet e tyre deri tani ka dalë mirë. Kjo politikë testimesh që është ndjekur ka qenë pozitive dhe nuk mendoj se duhet bërë ndonjë ndryshim i madh. Bëhen 250-260 testime në ditë.
Analizat serologjike janë një tjetër proces i rëndësishëm në këtë përballje, të cilat kanë nisur prej të hënës.
Tanka: Janë shumë të rëndësishme. Po presim të vihen në punë fillimisht për stafin mjekësor që merret drejtëpërdrejtë me Covid-19. Do të na ndihmojë nëse jemi imunizuar. Në një fazë të dytë do të shtrihen edhe në popullatën më të gjerë.
Në spitalin COVID 2 “Shefqet Ndroqi”, janë 8 pacientë të shtruar. 5 pacientë janë në terapi intensive në gjendje të rënduar, ndërsa 3 pacientë janë në pavion.
Tanka: Në spitalin tonë i kemi marrë të gjitha masat që çdo gjë të jetë korrekt në trajtimin e pacientëve, si në Reanimacion ashtu dhe pavion. Janë të gjitha kapacitetet.
Pavarësisht se mjekët janë në luftë me sëmundjet në të përditshmen e tyre, virusi i ri ka ndryshuar shumë çka nga një ditë e zakonshme pune.
Tanka: Kjo situatë ishte ndryshe për të gjithë ne mjekët. Është lufta ndaj një armiku të padukshëm dhe të gjithë kanë pasur një lloj stepje fillimisht. Por me mbrojtjen e duhur kemi arritur ta përballojmë. Edhe për pacientët, përveç sëmundjes që kanë, ka qenë prezent edhe stresi. Për pjesën më të madhe të pacientëve gjithçka ka shkuar mirë.Ka pasur ndryshime nga më herët. Kontaktin me kolegët dhe pacientin e kemi pasur të drejtëpërdrejtë kurse tani duhet të bëhemi gati me mjetet e mbrojtjes personale, me kostume dhe maska.
