Dy adoleshentë janë arrestuar nga policia e Shkodrës pasi kanë qëlluar me breshëri armësh, duke shkaktuar panik.
Në pranga janë vënë shtetasit L. A., 18 vjeç dhe K. G., 19 vjeç, të dy banues në qytetin e Shkodrës.
Ata kishin qëlluar me armë zjarri në ajër duke përhapur panik tek banorët e zonës në fshatin Kuç të Njësisë Administrative Gur i Zi në një livadh.
“Polcia gjeti armën e zjarrit kallashnikov, të cilën e kishin fshehur në një livadh në afërsi të lumit Drin. Gjatë kontrollit të banesës së shtetasit K. G, shërbimet e Policisë gjetën një armë zjarri pistoletë, dy karikatorë automatiku me fishekë dhe 410 fishekë luftarak. Ndërsa në banesën e shtetasit L. A., Policia gjeti një palë pranga dhe një shkop metalik me hapje, si ato që përdorin forcat e rendit.” thuhet në njoftimin e policisë.
Materialet i kaluan Prokurorisë së Rrethit Gjyqësor Shkodër, për veprime të mëtejshme, për veprat penale “Mbajtja pa leje e armëve dhe municionit luftarak” dhe “Prishja e rendit dhe qetësisë publike”, njofton policia.
