Nga Boldnews.al
Kryeministri Edi Rama vendosi të falë të gjithë personat e dënuar për shkelje karantine si ata të gjobitur me nga 10 mijë lekë ashtu edhe drejtuesit e automjeteve të cilët iu bllokuan lejet e drejtimit për një periudhë 3-vjeçare. Gjobat do të falen, por dera e burgut është hapur për të gjithë ata që tani e në vazhdim nuk zenë mend as nga “meshira” e Zotit të qeverisë, që sot vendosi “faljen dhe talljen e madhe”.
Kjo do të thotë se 7 mijë e 107 qytetarë që kanë thyer masat si këmbësorë nuk do paguajnë gjobën 10 mijë lekë teksa 1 mijë e 941 shoferëve që u është bllokuar mjeti apo automjeti, patenta dhe është dënuar me gjobë do i kthehet automjeti apo mjeti, patenta si dhe nuk do paguajë gjobë.
“Sot dua t’ju jap një provë të thjeshtë për shkak se ndëshkimet nuk janë as plan për t’u bërë si Enveri, as dëshirë e shpirtit tim diktatorial” – u shpreh Rama. Por pikërisht me këtë nismë, ka bërë as më shumë dhe as më pak se vetë diktatori.
Prej një muaji goja e tij nxirrte vetëm një refren: gjobë, burg, tradhtarë. Po çfarë ndodhi që në pragun e një fundjave të zerohen të gjithë masat administrative? Kjo është një lojë fort e ulët që më shumë se politike synon denigrimin e dinjitetit njerëzor, që pasi futi në ankth qytetarët që për të marrë bukë apo ujë do të duhet të rrinin me frikën e punonjësve të policisë që si skiftera të kërkonin “lejen qeveritare” të daljes, sot u jep lajmin se janë të falur.
Me “amnistinë e madhe”, kryeministri Rama nuk po shpik ndonjë strategji politike, thjesht po ve në zbatim një taktikë të vjetër, që në përgjithësi përdorej në mesjetë nga mberërit dhe perandorët tiranë, por edhe në kohën e diktaturës.
Në sistemin komunist pasi të dënonin me vdekje, të linin edhe një mundësi të fundit faljeje ose jo nga “Presidiumi i Kuvendit Popullor”. Kishte raste që diktatori Enver Hoxha vendoste ti falte jetën dikujt dhe më shumë se dhembsuri ishte një vrasje dyfish që të pafajshmin ta detyronte ti ishte mirënjohës një monstre vrastare me fytyrë njeriu.
Me veprimet e fundit, të cilat janë vazhdë e uzurpimit të çdo institucioni në tre vitet e fundit, kryeministrit Edi Rama i duhet dhënë “merita” pasi i ka bërë njerëzit që të mos bërtasin: drejtësi, drejtësi, por vetëm; mëshirë, mëshirë, ndonëse e dinë mjaft mirë se nuk kanë bërë asnjë faj, për të britur për falje nën çizmet e rënda të një pushteti arrogant.
Edhe pas faljes së djeshme të masave administrative fshihet një qëllim ugurzi që ditën e djeshme kaloi lehtë nga maskat deputetë, në miratimin e ndryshimeve në Kodin Penal. Rrezikohet që ai ligj i ashpër të zbatohet më përpikmëri, duke I kthyer qytetarët në kriminelë apriori.
Një individ që del jashtë orarit të përcaktuar nga qeveria për nevoja të tij dhe familjes rrezikon gjobë dhe burg deri në gjashtë muaj. Këto masa represive pritet të jenë në fuqi aq koha sa të jetë ende nëpër këmbë coronavirusi.
Duke përfituar edhe nga mungesa e angazhimit të institucioneve ndërkombëtare, veçarisht të zërave serioz në Bruksel, disa vende përfshirë edhe Shqipërinë janë kthyer frikshëm në shkeljen e lirive dhe të drejtave njerëzore, pikërisht duke përdorur gjendjen e jashtëzakonshme nga pandemia.
Edhe më e dhimbshme është se shumë qytetarë tashmë po i dorëzohen përfundimisht shteteve me elementë të fortë autoritar, duke mos kërkuar më demokraci dhe liri si individë, por vetëm mëshirë nga të pushtetshmit. Një “mëshirë” na e dha dje kryeministri Rama.
