Guvernatori i Nju Jorkut, Andrew Cuomo deklaroi se do i kërkojë qytetarëve të përdorin maska në publik, kur nuk mund të mbajnë distancën sociale rreth 2 metra larg nga të tjerët.
Në një konferencë të përditshme për shtyp njoftoi se do të lëshonte një urdhër ekzekutiv që do të hyjë të shtunën në fuqi.
“Nëse jeni duke udhëtuar me transport publik, ku ruajtja e distancës sociale është e pamundur, ose ecni në një tortuar të mbushur me njerëz, duhet të mbuloni fytyrën me shall ose maskë”, shkruajti ai në Twitter.
Guvernatori gjithashtu shtoi se testimi i koronavirusit në shkallë të gjerë ishte i nevojshëm për të rihapur shoqërinë, por shtetet nuk ishin ende në atë pikë.
“Sa më shumë testime, aq më shumë hapje e ekonomisë, por nuk ka kapacitete të mjaftueshme kombëtare për ta bërë këtë. Është shumë e vështirë për të arritur aty dhe kemi nevojë për ndihmën e qeverisë federale”, theksoi Cuomo.
Nju Jorku është epiqendra e shpërthimit të koronavirusit në Shtetet e Bashkuara.
