Botërori i vitit 2022 është planifikuar të mbahet në Katar. Gjithsesi ekziston mundësia që ky vendim të ndryshojë për arsye se ndaj Katarit dhe Rusisë, janë hedhur akuza se kanë dhënë ryshfete në mënyrë që të siguronin vota përpara se përcaktoheshim Kupat e Botës të vitit 2018 dhe 2022.
Në lidhje me këtë çështje, ish-presidenti i FIFA-s, Sep Blatter, ka deklaruar se nëse Katarit do ti hiqej mundësia e organizimit të Botërorit atëherë këtë detyrë mund ta marrë SHBA-ja.
“Botërori i vitit 2022? Mund ta organizojnë SHBA-të në vend të kampionatit të vitit 2026. Edhe Japonia mund të bëjë të njëjtën gjë. Di që është ofruar”, – tha Blatter.
84-vjeçari zviceran është kundër ndryshimit të strukturës së kampionatit nga 32 në 48 skuadra, duke iu kundërvënë hapur idesë së presidentit aktual të FIFA-s, Gianni Infantino.
“Për fat të mirë, kampionati është akoma me 32 skuadra dhe jo me 48, sikurse dëshironte Infantino. Edhe Gjermania mund ta organizojë, por do të luhej sërish në Europë”, theksoi ai.
