Ish-lojtari i Liverpool-it, Jamie Carragher, ka formuar një formacion ku pjesë e 11-shes, ishin kundërshtarët më të vështirë me të cilët është përballur ish-qendërmbrojtësi anglez.
Carragher i cili në karrierën e tij luajti vetëm për “The Reds”, e ndërtoi formacionin me skemën 4-3-3 dhe në portë zgjodhi Gianluigi Buffon.
Në krahun e djathtë dhe të majtë të mbrojtjes, përmendi përkatësisht Cafu-n dhe Paolo Maldinin. Në këtë kategori nuk përfshiu kolegun e tij te Sky Sport, Gary Neville.
Mes tyre, Carragher vendosi ish-lojtarët e Chelseat, Marcel Desailly dhe John Terry-n, duke e quajtur këtë të fundit si mbrojtësin më të mirë në historinë e Premier Ligës.
Në mesfushë, Carragher zgjodhi rivalin e tij te Man.United, Roy Keane dhe e vendosi atë mes legjendave të Barcelonës, Xavi dhe Andres Iniesta.
Për sa i përket sulmit, kishte dy zgjedhje të lehta për 42 vjeçarin, pasi zgjodhi pa hezitim Cristiano Ronaldon dhe Leo Messin. Përkrah dy ikonave të futbollit ai zgjodhi Thierry Henry-n, për të cilin deklaroi se është lojtari më I mirë i të gjitha kohërave në Premier League.
