Në 24 orët e fundit, shërbimet e policisë, kanë ndëshkuar 33 drejtues mjetesh, 729 shtetas dhe 19 administratorë lokalesh, në zbatim të masave kufizuese për vënien në kontroll të pasojave që sjellin përhapjen e COVID-19. Një numër i lartë krahasuar me ditët e tjera.
Bëhet me dije se në Lushnjë, shtetasi A. M., është ndëshkuar me masë administrative 700.000 lekë, pasi ka hyrë në Shqipëri nëpërmjet PKK Kakavijë, më datë 01 prill dhe duhet të ishte vetëkarantinuar, por është konstatuar jashtë ambienteve të banesës.
Burime zyrtare bëjnë me dije se 33 drejtues mjetesh janë ndëshkuar me heqje të lejes së drejtimit dhe bllokim mjeti, pasi kanë shkelur urdhrin e ndalim qarkullimit. Ndërkohë që 719 shtetas janë gjobitur me 10.000 lekë pasi janë konstatuar duke lëvizur me këmbë apo me biçikleta, pa ndonjë arsye apo emergjencë.
Ndërsa 9 shtetas janë ndëshkuar me 20.000 lekë dhe bllokim mjeti për 3 muaj, pasi nuk kanë zbatuar urdhrin për kufizimin e lëvizjeve në parqe dhe zona të gjelbra të hapura, në zonat urbane apo mjedise të tjera publike të hapura.
Në të gjithë vendin janë konstatuar dhe 19 lokale të hapura dhe ndaj administratorëve është marrë masa administrative, në bazë të nenit 3, pika 7 e Aktit Normativ Nr. 3, datë 15.03.2020.
Policia e Shtetit apelon për të gjithë qytetarët që të respektojnë masat kufizuese, për të bërë të mundur parandalimin e përhapjes së COVID-19.
