Një konflikt në zonën e Radhimës në Vlorë ka përfunduar me plagosjen e një personi me sende të forta.
Në vazhdën e konfliktit, është qëlluar me armë zjarri në ajër. Në vendgjarje janë gjendur 2 gëzhoja pistolete. Policia e mbërritur në vendin e ngjarjes ka nisur hetimet për ngjarjen.
“Rreth orës 11:00, në aksin rrugorë Orikum-Vlorë, pranë vendit të quajtur ‘Nënstacioni i Radhimës’ dyshohet se si pasojë e një konflikti ka mbetur i plagosur lehtë me sende të forta shtetasi D.K., 32 vjeç, banues në Radhimë dhe ndodhet jashtë rrezikut për jetën. Policia ka identifikuar dy autorët e ngjarjes të cilët për arsye hetimi nuk bëhen të ditur për momentin. Janë organizuar grupe të posaçme policore të cilat janë shpërndarë në qytet me qëllim kapjen e autorëve. Sektori i Hetimit në bashkëpunim me Komisariatin Vlorë vazhdojnë hetimet e mëtejshme për sqarimin e rrethanave të ngjarjes”, njoftoi policia.
