Arben Minga është shpallur si futbollisti më mirë i shekullit i Tiranës. Këtë përfundim kanë arritur tifozët e Tiranës të cilët kanë votuar me anë të një sondazhi.
Lajmi është publikuar në faqen zyrtare të Tiranës në “Facebook”, ku Arben Minga është shpallur si lojtari më i mirë dhe më i preferuar në historinë e klubit kryeqytetas.
Sulmuesi legjendar e bardhebluve ndërroi jetë në vitin 2007, por pas ka lënë një trashëgimi të padiskutueshme duke fituar respektin jo vetëm të tifozëve të Tiranës por edhe më gjerë.
“Një shekull histori dhe një numër shumë i madh ikonash bardheblu. Një çmim është shumë pak dhe të shumtë do të jenë emrat që do të vlerësohen në festën e 100 vjetorit. Jo vetëm kaq, por cilido që ka kontribuar për fanellën bardheblu do të ketë një vend në historikun e ditëve festive që klubi ka planifikuar.
10 ditë më parë propozuam të zgjidhnin tifozët lojtarin e shekullit bardheblu. Emrat e shënuar në mediat sociale kanë qenë të shumtë, si dhe propozimet për të mos u mjaftuar vetëm me një emër. Me të drejtë, pasi 100 vite histori kampionësh janë shumë.
Megjithatë, ky çmim simbolik meriton të jepet pasi tifozët i janë përgjigjur propozimit dhe kanë zgjedhur të preferuarin e tyre. Arben Minga është më i votuari ndër më të preferuarit e shekullit bardheblu.
Në ditët e festës së 100 vjetorit, çmimi për ikonën “15-katëshi Minga”, do të jepet pas përzgjedhjes së bërë nga tifozët. Ju falenderojmë dhe urojmë të jeni mirë e të rikthehemi sa më shpejt së bashku”, shkruan klubi i Tiranës.
