Koronavirusi/ Ademi: Ja çfarë bisedova me minsitren Manasterliu

Kryetarja e Bashkisë Shkodër, Voltana Ademi ka patur një bisedë telefonike me ministren e Shëndetësisë Ogerta Manastirliu ku i ka kërkuar informacion në lidhje me gjendjen në Shkodër nga Covid-19.

Përmes një postimi në Facebook, Ademi shprehet se, si kryetare e Bashkisë së Shkodrës, përfaqësuese e komunitetit, i ka përcjellë ministres problematikat që më janë referuar dhe që shqetësojnë qytetarët e Shkodrës.

Më pas, qytetarja e parë e Shkodrës tregon se çfarë i ka kërkuar konkretisht ministres.

Reagimi i plotë i Voltana Ademit:

“Sot kam patur një bisedë telefonike me Ministren e Shëndetësisë Znj. Ogerta Manastirliu.

Në kuadër të bashkëpunimit për përballimin e situatës së shkaktuar nga pandemia COVID – 19, si kryetare e Bashkisë së Shkodrës, përfaqësuese e komunitetit, kam përcjellë problematikat që më janë referuar dhe që shqetësojnë qytetarët e Shkodrës.

Duke vlerësuar të domosdoshme marrjen e masave për përballimin e pasojave të pandemisë, transparenca dhe ndarja e informacionit me qytetarët është e rëndësishme.

I kam kërkuar Znj. Ministre informacionin mbi:

• Numrin e personave që kanë telefonuar Urgjencën Kombëtare në numrin 127 që nga data 1 janar 2020, banues në Bashkinë Shkodër;
• Numrin e personave që kanë telefonuar numrin 127, dhe që janë orientuar të qëndrojnë në shtëpi, me shenja të dyshuara të pandemisë;
• Numrin e personave që kanë telefonuar numrin 127, dhe që janë orientuar sipas protokollit shëndetësor për analiza paraprake pas shqetësime që kanë patur, si të dyshuar me COVID-19:

1. a) Drejt Spitalit Rajonal në Shkodër
2. b) Drejt Spitalit Infektiv në Tiranë

• Numrin e personave që kanë telefonuar numrin 127, që kanë kryer testimin e plotë për COVID – 19, në territorin e Bashkisë Shkodër;
• Numrin e testeve në dispozicion të autoriteteve shëndetësore të Bashkisë Shkodër në datën 6 Prill, për rastet e dyshuara me COVID – 19;
• Numrin e testeve që priten të vijnë pranë autoriteteve shëndetësore në Shkodër, në ditët në vijim, për realizimin e testimit të personave që dyshohen të jenë prekur nga COVID – 19;”…

Kujtojmë se, Shkodra është qyteti i dytë më i prekur nga COVID-19 pas Tiranës.