Ministri i Shtetit për Diasporën, Pandeli Majko ka deklaruar se “30 emigrantët që ndodhet në Kapshticë të Korçës do të hyjnë në Shqipëri dhe do të vendosen për një periudhë dy javore në hotele”.
Gjatë një interviste televizive, Majko tha se “e gjithë kosto do të mundësohet nga “Këshilli i Kordinimit” (I përbërë nga pjesëtarë të Diasporës) dhe kjo do të aplikohet vetëm për këto emigrantë dhe për asnjë rast tjetër”.
Ai theksoi se Shqipëria është në karantinë dhe kufijtë janë të mbyllura.
“ Për sa i përket personave që kanë emergjencë, duhet paraprakisht të komunikojnë me Ambasadat dhe nëse marrin dakortësinë e tyre mund të drejtohen drejt Shqipërisë. Në të kundërt, të mos e marrin një vendim të tillë”, apeloi ministri.
“Unë kam që nga e premtja që merrem me këtë punë. Po merrem dhe në kuadër të një Këshilli të Diasporës. Por paraprakisht dua të sqaroj që masat shtrënguese janë marrë në konsultimet e bëra me mjekët, të cilët vlerësojnë situatën dhe jo nga politikanët, të cilët këtë koha kanë dalë në plan të tretë. Shteti shqiptar është në karantinë. Duket sikur në këtë situatë qeveria i ka hipur qejfi për të lënë persona në kufij. Personat që kanë një hall të rëndësishëm duhet të kontaktojnë me Ambasadën dhe nëse marrin dakortësinë e tyre mund të vijnë drejt Shqipërisë”, u shpreh Majko.
Ai theksoi se askush nuk do donte të kishte familjarin e vet atje. “Ne jemi në karantinë, sot njerëzit nuk shkojnë dot në mort. Vdiq artisti i madh Gëzim Kruja, sot do kishin dalë të gjithë ta përcillnin. Duket sikur qeveria do të luaje me nervat e shqiptarëve dhe të lërë njerëzit në kufi, por është e drejtë administrative në kudër të taskforcës për të bllokuar kufirin”, u shpreh Mjako.
Ministri shtoi se “sot që flasim do ketë liberalizim në vazhdim që domethënë për personat që nuk janë rezidentë jashtë, por shtetas të Shqipërisë që kanë një hall për të cilin do komunikojë me konsullatën, merr konfirmimin dhe niset drejt Shqipërisë.
Ai shtoi se “qytetarët duhet ta kuptojnë shumë mirë në çfarë situate jemi ne. Infektologët na kanë thënë mbyllni kufijtë”.
“Këshilli koordinues i diasporës ka dalë garant dhe janë të gatshëm të paguajnë edhe hotelet e karantinimit për këta njerëz. Po flasim vetëm për ata 20 e ca veta dhe që kanë vuajtur. Kur burri rri tre ditë në kufij e ka një hall, por për të tjerët rezidentë atje, karantinimi do jetë i fortë. Ne nuk diskutojmë sot thjesht të sëmurët, ne diskutojmë bartësit që janë mina me sahat. Ne nuk jemi shteti i vetëm që mbyllëm kufijtë. Më vjen shumë keq për çfarë ka ndodhur. Nuk dua të bëj as të butin, as të fortin. Qëndrimi i tyre në karantinë do paguhet nga këshilli i koordinimit të diasporës. Kjo nuk do të thotë që do hapen dyert për të tjerë. Për të tjerët as që bëhet fjalë”, deklaroi Majko.
Askujt, shtoi ai, duke filluar nga Kryeministri nuk do i shkonte në mëndje të luante me nervat e shqiptarëve duke u thënë mos hajdeni, kjo është vendosur nga ekspertët e taskforcës.
“ Ky absurditet nuk vjen nga një dëshirë qeveritare, por gjithë kjo histori po bëhet për jetën. Për këtë çështje u konsultova më herët me një mjek dhe e di si më tha? Më tha: më mirë të shtrirë ata atje në Kapshticë, se sa të vdekur të gjithë në spital”, deklaroi ministri Majko.
