Në komunikimin përmes Facebook-ut, kryeministri Edi Rama njoftoi lehtësimin e masave të vendosura nga qeveria për parandalimin e përhapjes së COVID-19.
Por kreu i qeverisë theksoi se nëse ka shkelje do të ketë penalizime më të forta se asnjëherë tjetër.
Rama tha se orari për të bërë pazar do të rritet në 90 minuta dhe se qytetarët mund të dalin për pazar me automjetet e tyre. Po ashtu njoftoi se bizneset që tani lejohen të punojnë, kanë mundësi të thërrasin në punë punonjësit e tyre.
Kryeministri tha se nëse një person kapet me familjen, apo do marrë pensionistë në makinë ndëshkimi do të shkojë deri në heqje të lirisë.
“Masat lehtësuese që duam të marrin kanë të bëjnë me lejimin e plotë të automjeteve për punonjësit e bizneseve të lejuara në punë, por jo marrja në këto automjete e familjarëve. Nëse personi në fjalë do kapet me familjen do dënohet me gjobë, heqje të lejes së drejtimit, sekuestrim mjeti, deri në heqje lirie. Marrja në makinë e pensinistëve po ashtu do marrë ndëshkim me disa vite deri në heqje lirie. Do të hapim orarin e lëvizjes për të bërë pazar, do e cojmë në 90 minuta, kryerja me automjet privat e pazarit do të jetë e mundur por me sanksione të forta, heqje e lejes së drejtimt në raste shkeljesh”.
Ai tha ndër të tjera se pritet të shihet edhe kjo javë për të ndryshuar masat që janë ende në fuqi dhe zëvendësimin e tyre me masa më të lehta sa i përket lëvizjes së qytetarëve.
