Mbretëresha 93-vjeçare Elizabet e Anglisë, do t’i drejtohet kombit me një mesazh pasnesër, të Dielën në darkë, me rastin e krizës së koronavirusit.
BBC bën të ditur se mesazhi do transmetohet nga televizionet dhe do jetë edhe në rrjetin social. Kjo është hera e katërt që Elizabeta i drejtohet kombit në këtë mënyrë, gjatë më shumë se 60 viteve të mbretërimit të saj.
Ato që mbahen mend më shumë, janë adresimet në vitin 91 gjatë luftës së Gjirit, apo fjalimi i vitit 1997 në funeralin e Lady Dianës.
Gjendja në Mbretërinë e Bashkuar mbetet e rëndë. Janë mbi 38 mijë të prekur dhe mbi 3600 të vdekur. Po më dramatike është bërë situata sot kur u njoftua lajmi i hidhur i ndarjes nga jeta të dy infermiereve të reja, 39 dhe 36 vjeç, të prekura nga virusi teksa shërbenin në luftë kundër tij.
Problem mbetet fundjava që po vjen, pasi temperaturat do të jenë të larta dhe tundimi i njerëzve për të dalë nga banesat do të jetë i madh.
Ndërkohë, qeveria vetëm ka këshilluar qytetarët të qendrojnë brenda dhe të izoluar, dhe nuk ka marrë masa kufizimi apo ndalimi në Angli, në demokracinë më të vjetër në botë.
